1Cor 9 | MHL | STEP | Nain yo yena kema-pa maa mauwa kookalep-na eliw onowa nain me oninen-i? Aria yo aposel me efa naimik nain feenap maiyem. Yo yena mokoka-pa yiena Maneka Yeesus me urufam-i? Ne yo me aposel-ki? Ona uuwowa efa sesekeya ikiwep ona opora me nia maakem-i? Naeya ni ona teeria-pa me wiar areman-i?

1 Corinthians 9

Pol Yeesus uuwowa onami sesa me opiya nain kemeliya

1 Nain yo yena kema-pa maa mauwa kookalep-na eliw onowa nain me oninen-i? Aria yo aposel me efa naimik nain feenap maiyem. Yo yena mokoka-pa yiena Maneka Yeesus me urufam-i? Ne yo me aposel-ki? Ona uuwowa efa sesekeya ikiwep ona opora me nia maakem-i? Naeya ni ona teeria-pa me wiar areman-i? 2 Wi teeria papako-ke aposel me efa naikuan pun eliw. Nain nis-ke feenap efa maowa-ke ikua, “Makena, o aposel-ke.” Moram yos-ke yiena Maneka opora nia maakemkun opora wiar opaman. Naapeya ni neeke yo yiena Maneka uuwomiyem nain efa ilenikuan. 3 Aria yo opora efa atupami maimik nain opora feenap wia kiripomiyem. 4 I yiena Maneka uuwowa-pa ikaimik nain maa enowa-ko yia asipam-ikeka, eliw naap nia maakiyen. 5 Ne oko feenap, wi aposel papako uuwowa-pa yiawemi wiena emeria feekiya ikiwimik. Ne Yeesus ona wiamun akena pun naap onimik. Ne Pita pun naap oniya. Ne is pun eliw naap onekamik, Kristen emeria wia aawep feekiya uuwowa ikiwekamik. 6 Ne oko, i Banabas ikos yiena wapena-pa uuwami maamuma imenap enowa sesenarep enimimik. I yiam erup muutiw naap onam-ikowa-ki?

7 Naemi fain pun kema suuweka. Wi ami mua wiena wiam sesenarimik-i? Weetak. Ne mua eena wain piita upep-puap ikoka makenareya makena me eniminon-i? Weetak, eniminon. Ne mua ona sipsip nepiem-ikok meseka mufep me eniminon-i? Weetak, ikoka eniminon. Aria sira-ke feenap ikua, no nena uuwowa-pa uuwap sesa aawinan. 8 Nain me i mua uuwowa muutiw yiam maemik. Mua Maneka sira wuomakek nain pun naap akena maek. 9 Moram Mua Maneka sira Moses maakek nain feenap wiar siisimep-puamik,

“Bulmakau wit makena mereniw ititam-ikaeya opaimika me wiar kaike, uuwam-ikok makena neek enem-ikainok.”
(Lo 25.4)

Naap maek. Aria Mua Maneka opora maek nain bulmakau kema suuwap maek-i? Weetak. 10 I uuwow mua yia maemi naap maek. Feenap, mua manina uuwimik nain maa enowa-ko yiar imenareya enimiyen, naap maimik. Ne wit makena ititami kanima iirarimik nain pun naap maimik, “I uuwap enimiyen.” 11 Yo maa isakowa maem nain feenap, is-ke Mua Maneka opora nia maakemkun opora wiar opap baliwep ikeman. Naapeya feenap nia maakekamik, ni enowa-ko yia asipam-ikeka, i naap maowa me eliw-i? I eliw enowa nia maakiyen.

12 Wi uuwow mua papako enowa wia urufam-ikaiman. Nain eliwa-ke. Nain i kiikir enowa yia urufap-puap ikoka wi wia urufam-ikowa-ke ikua. Nain i eliw naap nia maakowa nain me nia maakemik. Ne i maa mauwa iiwarimik nain oram naap ikaimik. Oko i enowa nia maakiyen-na Krais opor eliwa nia maakowa nain era yiam puukiyen. 13 Aria ni fain kema suuweka, wi Mua Maneka tempel koora-pa uuwimik nain wi nan enowa aawimik. Feenap, wi mua maa enowa pikiwep tempel koora-pa Mua Maneka patirami aria okaiwi wi pris wia wuomimik. Ni nain me amisareman-i? 14 Ne is pun naap, yiena Maneka-ke sira fain wuami maek, “Ni teeria ona yo opor eliwa wia maakem-miawimik nain enowa wia urufeka.”

15 I yia asipowa nain eliw nia maakekam, nain me nia maakem. Ne aakisa opor unowa maiyem fain pun yo efa asipeka naep me nia maakiyem, weetak. Yo oram opora maem. Yo efa asipowa nia maakowa nain miatin-afuriyem. Oo, yo eliw uminen nain maa nain me nia maakinen. Moram yo oram uuwiyem nain yame iram-ikaiyem, nain mua oko-ke me efa puukuk. 16 Feenap, uuwowa nain yiena Maneka-ke yo mia-pa efar wueya yo uuwowa-pa ikem. Naapeya Yeesus opor eliwa wia maakiyem nain unuma yame pirowa-ko me ikua. Yo opor eliwa nain me wia maakem-miawinen-na, aa yo eliwa me ikainen. 17 Yo uuwowa fain yena kookalowa-pa uuwekam-na sesa naekam. Nain me yena kookalep uuwiyem, yiena Maneka ona uuwow maneka fain mia-pa efar wueya yo sesa marew eliw uuwam-ikaiyem. 18 Aria naap nain yo uuwiyem fain efa saliwowa kamenap? Yo sesa epak nain faneka, feenap, yo sesa marew Yeesus opor eliwa wia maakem-ikainen. Nain maa eliwa-ke. Ne yo uuwiyem fain maa eliw aawowa nain me aawiyem.

Pol uuwow mua wame arowami mua unowiya wia asipiya

19 Makena, yo uuwiyem fain yo mua oko tepak-pa me wiar ikem. Naapeya mua-ko me efa maakuk. Nain taar teekow mua yame arowap wi mua unowiya wia asipiyem. Naapeya wi mua unowa wia maakemkun kema kirep Krais opora wiar opuk. 20 Feenap, yo owow-owowa ikiwemi yiena Yuuda ikemik nain nan wiamiya ikok yiena kae sira kakeniw ookiyem, Krais opora wia maakemkun opora wiar opuk naep. Makena, yo feenap me maem, yo Moses sira wuomakek nain ookamkun Mua Maneka-ke efa mainon, “No mua kaken eliwa-ke.” Yo naap me maem. Nain wi Yuuda-ke sira nain naap ookam-ikaimik. Naapeya yo wi wiamiya ikok wi sira onimik nain yos pun wiokiyem. Wi kema kirep Krais opora wiar opuk naep. 21 Ne wi teeria oko wi me Yuuda-ke, naeya wi Moses sira wuomakek nain tepak-pa me wiar ikemik. Aria yo wiamiya ikok wi wiena sira-pa ikaiwkin yos pun wiena sira wiokiyem. Yeesus Krais opora wia maakemkun wiar opuk naep. Makena, yo Moses sira wuomakek nain tepak-pa me ikem, nain yo Mua Maneka sira me ookiyem naap me naiyem, weetak. Moram yo Krais sira wiar ookiyem. 22 Aria wi Yeesus teeria-pa ikemik nain mua papako sira wiar ookowa me kekanimik. Yo wiamiya ikok wi maa fariarowa sira naap nain onimik, yos pun eliw naap oninen. Wi Krais sira baliwep wiar ookuk naep yo wia ane-kekanowiyem. Yo naap onami wi teeria ononer wiamiya ikaiyem nain wiena sira wiar ookiyem, wi mua papako pina onowa piipuap Krais teeria wiar ekuk naep. 23 Yo mua unowa Krais opor eliwa wia maakemkun wiar opuk naep naap oniyem. Naeya i epaskun arep Mua Maneka pokow eliwa yia maek nain unowiya urufiyen.

I yiena yiam kaikap Yeesus ookowa-ke

24 Aria ni fain-ko me amisareman-i? Karuowa naep mua unowa karuimik. Aria mua kuisow muuta o kiikir fuuniya nain-ke nomakep maa eliwa aawinon. Naapeya nia maakiyem, Mua Maneka ona teeria maa ele-eliwa nia wuap-puomak nain aawu naep mia niam saliwap ikok o ookam-ikeka. 25 Feenap, wi mua karuowa naemi mia paara ne kepura goro-gorarowa naep maa unowa fariarep ikok wiam akimam-ikaimik, ikoka nomakemkun maa bala ikiwosa-pa yia wuomiwkin unum maneka aawiyen naep. Miiw maa bala naap nain wiimar samorareya wafurikuan. Ne i me miiw maa naap nain maimik, i yiena yiam saliwap Yeesus sira-pa baliwep ikaiyen. Naeya ikoka Mua Maneka-ke maa bala ikiwosa-pa yia wuomiya nain anane maneka naap ikainon. 26 Yo naapeya Mua Maneka sira wiar ookowa kekaniyem. Feenap saarik, yo karuowa miimowa urufami oona reenep karuiyem ne i mua yiam erup irakowa yiam akimami yo wapena momor me wafuriyem. 27 Naemi yo feenap oniyem, yena yame kaikap mia kookalowa iiwawun piipuiyem. Oko yo Krais sira wiar ookuk naep wia maakem-ikaiyem, nain yena wakinen. Naeya Mua Maneka-ke efa mainon, “no wakien, no iiwawun wia.”